काभ्रेका १० स्थानीय तहमा कोरोना भाईरसको दोस्रो लहरका संक्रमित

१० बैशाख, धुलिखेल: काभ्रेमा कोरोना संक्रमितको संख्या ह्वात्तै बढेको छ । आज एकैदिन २३ जना संक्रमित थपिएका छन् । योसँगै संक्रिय संक्रमितको संख्या ८२ पुगेको छ ।

जिल्लाका १३ स्थानीय तह मध्ये १० स्थानीय तहमा कोरोना भाईरसको दोस्रो लहर देखिएको हो । खानीखोला, महाभारत र बेथानचोक गाउँपालिकामा मात्रै हालसम्म दोस्रो लहरको कोरोना संक्रमित देखिएका छैनन् ।

हालसम्म सबैभन्दा बढी धुलिखेल नगरपालिकामा २६ जना संक्रमित छन् । पनौती नगरपालिकामा १५ र बनेपा नगरपालिकामा १४ जना संक्रमित रहेको स्वास्थ्य कार्यालय काभ्रेका बरिष्ठ स्वास्थ्य प्रशासक डाक्टर नरेन्द्र कुमार झाले जानकारी दिनुभयो ।

जिल्लाको पाँचखाल नगरपालिकामा ७ जना, मण्डनदेपुर नगरपालिकामा ६ जना र रोशी गाउँपालिकामा ५ जना संक्रमित रहेका छन् । त्यसैगरि नमोबुद्ध नगरपालिकामा ४ जना, चौरीदेराली र तेमाल गाउँपालिकामा २/२ जना र भुम्लु गाउँपालिकामा १ जना संक्रमित रहेको स्वास्थ्य कार्यालय काभ्रेले जनाएको छ ।

संक्रमित मध्ये ७८ जना होम आईसोलेसनमै छन् । ४ जना अस्पतालको आईसोलेसनमा छन् । गम्भीर बिरामी नभई कोरोना संक्रमितको अस्पतालमा भर्ना गर्ने गरिएको छैन । होम आईसोलेसनमा बस्दा संक्रमित उचित स्वास्थ्य सावधानी नअपनाउने हो भने परिवार र टोलकै बस्तीका धेरै मानिस एकैपटक संक्रमित हुने चिन्ता चिकित्सकहरूले गरिरहेका छन् ।