पाँचखाल नगरपालिकाका मेयर खरेलले गरे स्वास्थ्य सावधानी अपनाउन १२ बुदेँ अपील

७ बैशाख, धुलिखेलः पाँचखाल नगरपालिकाका मेयर महेश खरेलले कोरोना भाइरसबाट जोगिन नगरबासीलाई अपील गर्नुभएको छ । मेयर खरेलले आज १२ बुदेँ अपील जारी गर्नुभएको हो ।

अपीलमा नगरपालिकाभित्रका मठ, मन्दिर, मस्जिद, गुम्बा, चर्चलगायतका धार्मिक स्थलमा जनस्वास्थ्यमा मापदण्ड पालना गर्ने गरी बैशाख मसान्तसम्म नित्य पूजा, ध्यान र प्रार्थना मात्रै गर्ने भनिएको छ । नगरपालिकाले एक पटकमा पच्चीस जना भन्दा बढी हुने कुनै पनि सभा, सम्मेलन, गोष्ठी, सेमिना, समीक्षा, बैठक, तालिम, प्रशिक्षण जस्ता कार्यक्रम नगर्न भनिएको छ । त्यस्तै सपिङ मल, डिपार्टमेन्ट स्टोर जस्ता भिडभाड हुने ठाउँमा दुई मिटरको दुरी कायम गर्ने, मास्क अनिवार्य गर्ने र पटक पटक हात धुन अपील गरिएको छ ।

विवाह, ब्रतबन्धका लागि पार्टी प्यालेस प्रयोग गर्नु परेमा जनस्वास्थ्यका मापदण्ड पालना गर्ने गरी प्रमुख जिल्ला अधिकारीको पूर्व स्वीकृति लिन आग्रह गरिएको छ । नगरपालिकाले भिड भएको गाडी नचढ्न पनि भनेको छ । नियमित रुपमा सञ्चालन हुनुपर्ने स्वास्थ्य सेवाहरु जनस्वास्थ्यका मापदण्ड पालना गरेर नियमित सञ्चालन गर्न पनि भनिएको छ ।