जो काभ्रेबाट संघ र प्रदेश सभामा चुनिए

मंसिर ४ गते सकिएको संघ र प्रदेश सभाको निर्वाचनको प्रत्यक्ष तर्फ काभ्रे जिल्लामा मत परिणाम सार्वजनिक भएको छ । काभ्रेको दुई वटा प्रतिनिधि सभा र चार वटा प्रदेश सभाको अन्तिम मत परिणाम सार्वजनिक भएको हो ।

काभ्रे प्रतिनिधि सभा निर्वाचन क्षेत्र नम्बर १ मा लोकतान्त्रिक बाम गठबन्धनका उम्मेदवार माओवादी केन्द्रका सुर्यमान दोङ (लालध्वज) निर्वाचित हुनुभएको छ ।

दोङले एमाले उम्मेदवार रेशम लामासँग ३९६४ मतान्तरमा विजयी हुनुभएको हो । दोङ ३४ हजार ४ सय १२ मत ल्याउँदा रेशम लामाले भने ३० हजार ५ सय ४८ मत प्राप्त गर्नुभएको थियो ।

प्रतिनिधि सभा १ को प्रदेश सभा १ मा लोकतान्त्रिक बाम गठबन्धनकै माओवादी केन्द्रका रत्न ढकाले विजयी हुनुभएको छ । ढकालले प्रतिस्पर्धी एमालेका उम्मेदवार दिल बहादुर तामाङ भन्दा ९ हजार ४४२ मत बढी ल्याएर विजयी हुनुभएको हो । ढकालले २० हजार ७२० मत प्राप्त गर्दा तामाङले ११ हजार २७८ मत प्राप्त गर्नु भएको थियो । ढकाले प्रदेश सभामा दोस्रो कार्यकालका लागि विजयी हुनुभएको हो ।

प्रतिनिधि सभा १ को प्रदेश सभा २ मा लोकतान्त्रिक बाम गठबन्धनका नेपाली कांग्रेस काभ्रेका सभापति तीर्थ लामा विजयी हुनुभएको छ । एमालेका चन्द्र लामालाई ३ मतले हराउँदै तीर्थ लामा निर्वाचित भएका हुन् । तीर्थ लामाले १९ हजार २ सय ८० मत प्राप्त गरेका छन् भने चन्द्रले १९ हजार २ सय ७७ मत पाएका छन् ।

काभ्रे प्रतिनिधि सभा निर्वाचन क्षेत्र नम्बर २ मा एमालेका गोकुल प्रसाद बास्कोटा विजयी हुनुभएको छ । लोकतान्त्रिक बाम गठबन्धनको साझा उम्मेदवार शिव प्रसाद हुमागाईं भन्दा ५ हजार ८६३ बढी मत ल्याएर बास्कोटा बिजयी हुनु भएको हो ।

बास्कोटाले ४५ हजार ३४५ मत पाउँदा हुमागाईंले ३९ हजार ५८२ र राष्ट्रिय स्वतन्त्र पार्टीका दिनेश हुमागाईंले १० हजार ५८६ मत पाउनुभएको थियो । बास्कोटा प्रतिनिधि सभामा दोस्रो कार्यकालका लागि विजयी हुनुभएको हो ।

काभ्रे प्रतिनिधि सभा निर्वाचन क्षेत्र नम्बर २ को प्रदेश सभा १ मा लोकतान्त्रिक बाम गठबन्धनका नेकपा (एकीकृत समाजवादी) का लक्ष्मण लम्साल विजयी हुनुभएको छ । लम्सालले एमालेका कुमार खकुरेललाई १८८ मतको फरकले हराउनुभएको हो ।

लम्सालले १९ हजार ४०८ मत प्राप्त गर्दा खकुरेलले १९ हजार २२० मत प्राप्त गर्नुभएको थियो । लम्सालले प्रदेश सभामा दोस्रो कार्यकालका लागि विजयी हुनुभएको हो ।

काभ्रे प्रतिनिधि सभा निर्वाचन क्षेत्र नम्बर २ को प्रदेश सभा २ मा कांग्रेसका कञ्चनचन्द्र बादे विजयी हुनुभएको छ । बादेले निकटतम प्रतिद्वन्द्वी एमालेका कुमार थापालाई ४ हजार ७८ मतले पछि पार्दै विजयी हुनुभएको हो । बादेले २६ हजार ३५ मत प्राप्त गरेका छन् । यता एमालेका थापाले २१ हजार ९ सय ५७ मत पाएका छन् ।