माधव समूहमा बस्न नमोबुद्ध नगरपालिकाका कान्छामान र राम बहादुरद्वारा अस्वीकार

६ बैशाख, धुलिखेलः काभ्रेको नमोबुद्ध नगरपालिका वडा नम्बर ५ का दुई जनाले माधव समूहमा बस्न अस्वीकार गरेका छन् । हिजो बनेपामा भएको माधव समूहको भेलाले जिल्ला कमिटी सदस्यमा चयन गरेको कान्छामान तामाङ र जिल्ला सल्लाहकार परिषद् सदस्यमा राखिएका राम बहादुर सिलवालले आफुहरु माधव समूहमा नरहेको बताएका हुन् ।

कान्छामान र राम बहादुरले संयुक्त विज्ञप्ति जारी गर्दै आफुहरु एमालेको सुदृढ एकताको पक्षमा रहेको भन्दै कुनै एउटा गुटको भेलाले जर्वजस्ती नाम समावेश गरेकोमा आपत्ति जनाएका छन् । उनीहरुले देशभर समान्तर कमिटी गठन गरेर पार्टीलाई विभाजन गर्न खोजेको आरोप लगाउँदै माधव समूहले राखेको कुनै पनि पदमा आफुहरु नरहेको स्पष्ट पारेका छन् ।

कान्छामान र राम बहादुरले आफुहरु एमालेको आधिकारिक कमिटीको पूर्ववत जिम्मेवारीमा नै रहेको दाबी गरेका छन् । कान्छामान र राम बहादुर दुबै जना एमालेको नमोबुद्ध नगरकमिटी सदस्य हुन् । माधव समूहले हिजाे टाेक बहादुर वाइबा अध्यक्ष रहेकाे २०१ सदस्यीय जिल्ला कमिटी घाेषणा गरेकाे थियाे ।