पनौती नगरपालिकाले भन्यो ‘मानेश्वरी बसपार्क खाली गर’

३ बैशाख, धुलिखेलः काभ्रेको पनौती नगरपालिकाले मानेवश्वरी बसपार्क खाली गराउन निर्देशन दिएको छ । बसपार्क मर्मत सुधारको काम गर्नुपर्ने भएकाले तत्काल खाली गर्न नगरपालिकाले भनेको हो ।

बसपार्क भोली देखि मर्मत सुधारको काम हुने नगरपालिकाले जनाएको छ । नगरपालिकाले यातायातका साधन तोकिएको स्थानमा पार्किङ गर्न र फुटपाथ समेत हटाउन भनेको छ ।

नगरपालिकाका अनुसार बसपार्क कालोपत्रे गर्न कम्तिमा १० दिन लाग्नेछ । यो अवधिमा हालको मानेवश्वरी पुल पारीबाट पनौती, बनेपा, काठमाण्डौ चल्ने सवारी चल्ने छ । त्यस्तै खोपासी, ढुंखर्क, काँमीडाँडा तर्फ जाने सवारीसाधनलाई बजारभित्रबाट सञ्चालन गर्ने ब्यवस्था मिलाइएको छ । नगरपालिकाले नीजि सवारी र भाडाका सवारी साधनहरु आ आफ्नो स्थानमा पार्किङ गर्न आग्रह गरेको छ ।

मोटर साइकल, साइकल जस्ता दुई पांग्रे सवारी साधनहरु तरकारी बजारमा पार्किङ गर्ने ब्यवस्था मिलाइएको छ ।