जिसस काभ्रेका प्रमुख गौतमले भने ‘म सबैको साझा भएर काम गर्छु’

जिल्ला समन्वय समिति काभ्रेका प्रमुख दिपक गौतमले आफु साझा ब्यक्तिको रुपमा उभिने प्रतिबद्धता जनाउनुभएको छ ।

आज जिससको सभा हलमा जिल्लाका पत्रकारहरुसंगको छलफलमा प्रमुख गौतमले पार्टीको रुपमा कसैलाई पनि ब्यवहार नगर्ने बताउनुभयो । ‘म सबैलाई समन्वय गर्ने स्थानमा छु । मैले पार्टीगत ब्यवहार गर्ने छैन् । सबैको साझा ब्यक्ति भएर काम गर्नेछु । प्रमुख गौतमले भन्नुभयो ।’

प्रमुख गौतमले जिल्लाका स्थानीय तहहरुले गरिरहेका असल अभ्यासलाई आम जनता सामु ल्याउन र खराब कामप्रति खबरदारी गर्न पत्रकारलाई आग्रह गर्नुभयो । ‘भैरहेका राम्रा कुराको प्रचारप्रसार गरिदिनु होला । खराब हुँदैछ भने पनि खबरदारी गर्नु होस् । सकेसम्मको राम्रो काम गर्नेछु । राम्रो गर्न सकिएन भने पनि नराम्रो काम गर्दिन । प्रमुख गौतमले भन्नुभयो ।’

जिसस प्रमुख नेकपा (एकीकृत समाजवादी) काभ्रेका जिल्ला सचिब पनि हुनुहुन्छ । गौतम गएको १ गते भएको जिससको निर्वाचनमा गठबन्धनको तर्फबाट प्रमुखमा निर्वाचित हुनुभएको थियो । प्रमुखको पदभारग्रहण पश्चात प्रमुख गौतमले जिल्ला प्रशासन कार्यालय काभ्रेका अब्यवस्थित लाइनलाई ब्यवस्थित गर्न पहल गरिसक्नु भएको छ ।

त्यस्तै रोशी गाउँपालिका वडा नम्बर ११ स्थित बाढी ग्रस्त बीपी राजमार्गको स्थलगत अवलोकन गरेर राजमार्गलाई तत्काल सहज रुपमा सञ्चालन गर्ने वातावरण निर्माण गर्न पहल थाल्ने प्रतिबद्धता जनाइरसक्नुभएको छ ।