भुम्लु गाउँपालिकामा राष्ट्रपति रनिङ शिल्ड प्रतियोगिता सम्पन्न

भुम्लु गाउँपालिकामा राष्ट्रपति रनिङ शिल्ड प्रतियोगिता सम्पन्न भएको छ । जेठ १७ गतेदेखि भुम्लु गाउँपालिकामा सुरु भएको दोस्रो राष्ट्रपति रनिङ शिल्ड प्रतियोगिता सम्पन्न भएको हो । भुम्लु गाउँपालिकाका उपाध्यक्ष जितेन्द्रमान तामाङ (दावा) को प्रमुख आतिथ्यतामा प्रतियोगिता सम्पन्न भएको हो ।

प्रतियोगितामा प्रकाश माध्यामिक विद्यालय ९ स्वर्ण सहित प्रथम भएको छ । यस्तै अरुणोदय माध्यामिक विद्यालय ७ स्वर्ण दोस्रो र सेतीदेवी माध्यामिक विद्यालय भुम्लु १ रिठ्ठे ३ स्वर्ण सहित तेस्रो भएको छ ।

पालिकाका विद्यालय स्तरीय खेलकुद प्रतियोगितामा पालिकाका १३ विद्यालयका ३ सय २० विद्यार्थी सहभागी थिए । प्रतियोगिता भुम्लु गाउँपालिका शिक्षा, युवा तथा खेलकुद शाखाले आयोजना गरेको हो । प्रतियोगितामा भलिबल, कबड्डी, हाइ जम्प, लंग जम्प, ज्याब्लीङ थ्रो, दौड लगायतका खेलहरु समावेश गरिएको थियो ।

कार्यक्रममा प्रमुख अतिथी तामाङले विजयी समूह तथा खेलाडीहरुलाई पुरस्कार वितरण गर्नुभएको थियो । भने भुम्लु गाउँपालिका निवर्तमान उपाध्यक्ष कल्पना श्रेष्ठले टिका तथा भुम्लुका प्रमुख प्रशाशकीय अधिकृत ढाकाराम अर्यालले खेलाडीहरुलाई प्रमाणपत्र प्रदान गर्नुभएको थियो ।

खेलाडीहरुलाई पुरस्कार वितरण गर्दै उपाध्यक्ष तामाङले भुम्लुमा खेल निरन्तर अगाडी बढाउने बताउनुभयो । तामाङले पालिकाको खेलकुद क्षेत्रको विकासमा आफ्नो सदैव साथ र सहयोग रहने बताउनुभयो । उहाँले भुम्लुबाट राष्ट्रिय स्तरका खेलाडी तयार हुनेमा आफू प्रतिबद्ध रहने भनाई राख्नुभयो ।

शिक्षा, यूवा तथा शाखा प्रमुख प्रेमकुमार पुरीको सभापतित्वमा सम्पन्न कार्यक्रममा पालिकाका वडाध्यक्ष पनि सहभागि हुनुभएको थियो ।