बनेपा-६ का वडाध्यक्ष केसीले सेवा सुविधा नलिने, स्वास्थ्य र शिक्षामा खर्च गर्ने

बनेपा नगरपालिका वडा नम्बर ६ का वडाध्यक्ष सचिता नन्द केसीले यो पटकको सेवा सुविधा बापतको रकम स्वास्थ्य र शिक्षामा लगानी गर्ने निर्णय गर्नुभएको छ ।

आज दोस्रो कार्यकालका लागि पदभार ग्रहण गर्दै वडाध्यक्ष केसीले आफूले पाउने सेवा सुविधा बापतको रकम स्वास्थ्य र शिक्षामा खर्च गर्ने बताउनुभएको हो ।

वडाले छुट्टै करारमा स्वास्थ्यकर्मी नियुक्त गरेर वडाबासीको घर घरमा सुगर, प्रेसर सहित राज्यले प्रदान गर्ने निःशुल्क औषधी पुर्याउने कामको थालनी गर्ने बताउनुभयो ।

स्वास्थ्यको क्षेत्रमा खर्च गरेर बाँकी रहेको रकम गुरूकुललाई प्रदान गर्ने वडाध्यक्ष केसीले बताउनुभयो । ‘हामी निरोगी वडा बनाउन चाहान्छौं । वडाका आमाबुबा, दाजुभाइ तथा दिदी बहिनी निरोगी हुनु भनेको वडाको विकास निर्माणमा थप टेवा पुग्नु हो । सामान्य परीक्षणका लागि पनि अस्पताल र मेडिकल धाउनु पर्ने अवस्थाको अन्त्य गर्न आवश्यक छ । त्यो कामको सुरुवात तत्काल गर्छौ । वडाध्यक्ष केसीले भन्नुभयो ।’

वडा केसीले अधूरा रहेका कामलाई क्रमिक रूपमा पुरा गर्दै लैजान प्रतिबद्धता जनाउँदै खबरदारी गर्न वडाबासीलाई आग्रह गर्नुभयो । ‘हामी निर्णय गर्ने ठाउँमा मात्रै पुगेका हौ । हामी मत दियौँ । अब उनीहरूले नै गर्छन भनेर मात्रै हुँदैन । तपाईहरूले हामीलाई बेला बेला झक्झकाउनु पर्छ । अनि मात्रै वडाको काममा सम्मान सहभागीता हुन्छ । वडाध्यक्ष केसीले भन्नुभयो ।’