काभ्रेका यी ठाउँ, जहाँ कोभिड खोप कार्ड नलिइ जान पाइदैँन

जिल्ला प्रशासन कार्यालय काभ्रेले माघ ७ गतेदेखि लागुहुने गरी कोभिड खोप कार्ड साथैमा राख्न भनेको छ ।

प्रमुख जिल्ला अधिकारी शिवराम पोखरेलले जारी गरेको आदेश र जिल्ला कोभिड ब्यवस्थापन समिति (डिसीएमसी) ले गरेको निर्णयमा यस्तो ब्यवस्था गरिएको हो । सरकारी कार्यालय, होटल, रेष्टुरेण्ट, सिनेमा हल, रंगशाला, पार्क लगायतका सार्वजनिक स्थलमा जाँदा कोभिड खोप अनिवार्य साथैमा राख्नु पर्नेछ ।

कोभिड खोप कार्डको मोबाइलमा फोटो खिचेर राख्दा पनि हुनेछ । प्रशासन कार्यालयले सार्वजनिक सवारी साधानमा कुल सीट क्षमताभन्दा बढी यात्रु नबोक्न चालक र सहचालकलाई भनेको छ । सवारी साधनमा यात्रा गर्दा जनस्वास्थ्यका सबै मापदण्ड पालना गर्न पनि प्रशासन कार्यालयले आग्रह गरेको छ ।

काभ्रे जिल्लामा पछिल्लो समय कोभिड संक्रमणको दर निकै बढेको छ । हिजो साँझसम्म १०५ जना सक्रिय संक्रमित पुगेका छन् । सबैभन्दा बढी बनेपा नगरपालिकामा ५३ जना सक्रिय संक्रमित रहेका छन् ।

धुलिखेल नगरपालिकामा २६ जना, पनौती नगरपालिकामा ९ जना, नमोबुद्ध नगरपालिकामा ६ जना, पाँचखाल नगरपालिकामा ४ जना, मण्डनदेउपुर नगरपालिका र भुम्लु गाउँपालिकामा ३/३ जना र बेथानचोक गाउँपालिकामा १ जना सक्रिय संक्रमित रहेको स्वास्थ्य कार्यालय काभ्रेले जनाएको छ ।

अहिलेसम्म चौरीदेउराली, रोशी, तेमाल, खानीखोला र महाभारत गाउँपालिकामा एक जनामा पनि पछिल्लो भेरियन्ट देखिएको छैन् । सक्रिय संक्रमित मध्ये बनेपाका २ जना अस्पतालमा उपचारत छन् ।