के एमाले काभ्रेमा ‘ग्रुपिजम’ नहोला ?

जिल्ला अधिवेशनको संघारमा आइपुग्दा एमाले काभ्रेमा कोठे बैठकले प्राथमिकता पाउने सम्भवना बढ्दै गएको छ ।

नेतृत्वको लागि धेरैले दाबी गरेका छन् । पदाधिकारीमा पनि उस्तै टकराब छ । सचिवालयमा बस्नेको पनि हानाथाप बढ्दै गएको छ ।

अहिलेसम्मस एमालेका कार्यकर्ताहरुको भनाई सुन्दा पार्टी जिल्ला अध्यक्षका लागि अशोक कुमार ब्याञ्जु श्रेष्ठको नाम पहिलो नम्बरमा छ । तर यो नम्बर घट्न पनि सक्छ ।

पोलिटब्युरो सदस्य एवं काभ्रे जिल्ला इन्चार्ज गोकुल बाँस्कोटाले आड र भरोसा दिए अध्यक्ष बन्ने होडमा भिम न्यौपाने, नारायण पाण्डे, चन्द्र लामा र कञ्चन अधिकारी पनि छन् । तर उनीहरु अध्यक्षको दाबी गरेर पदाधिकारीका लागि लबिङ गरिरहेका छन् ।

बाँस्कोटाले अघि सारेको नाममा जिल्लाका नेताले सहमति नजाए वा केन्द्रीय अन्य नेताको प्रभाव पर्न थाल्यो भने अधिवेशनमा ‘ग्रुपिजम’ हुने पक्का छ । काभ्रेका कयौँ एमाले नेताहरु जिल्लामा बाँस्कोटालाई नेता मानेपनि केन्द्रमा मान्दैनन् । अर्थात् केन्द्रीय सम्बन्ध बाँस्कोटा बाहेक अन्य प्रभावशालि नेताहरुसँग काभ्रेका नेताको रहेको छ ।

एमालेको ठूलो तप्का नेकपा (एकीकृत समाजवादी) मा छ । यसको मतलब एमालेले जिल्लामा गुट समाप्त भयो भन्ने आधार छैन् । किन भने अझैपनि त्यहाँ असन्तुष्ट पक्ष छ । जो पद नपाए विद्रोह गर्नपछि पर्दैन् ।

पाँचखालका प्रायः एमाले कार्यकर्ताले कञ्चन अधिकारीलाई अध्यक्ष बनाउन सामाजिक सञ्जाल फेसबुक मार्फत क्याम्पियन सुरु गरेका छन् । यो क्याम्पियनको नेतृत्व खास गरी अनेरास्ववियुमा आबद्ध अधिकारीका शुभचिन्तकहरुले गरिरहेका छन् ।

अधिकारीलाई काउण्टर दिन अधिवेशन सुरु हुनु अघि धुलिखेलबाट पनि अशोक कुमार ब्याञ्जु श्रेष्ठ निकट युवा र विद्यार्थीले क्याम्पियन नचाउलान भन्न सकिन्न । त्यस्तै भिम न्यौपाने र नारायण पाण्डेले पनि आफुलाई थप सक्रिय बनाउँदै लगेका छन् । त्यसमा चन्द्र लामाले पनि अध्यक्षको लागि दाबी गरेपछि ‘ग्रुपिजम’ को सम्भवना निकै उच्च बनेको हो ।

यदि बन्दसत्रमा गोकुल बाँस्कोटाले सहमतिका लागि प्रस्ताव गर्ने नाम अस्वीकार भयो भने सबै जसो पदमा निर्वाचन हुनेछ । यो अधिवेशन बाँस्कोटा एक्लैले ‘हेन्डील’ गर्छन् वा केन्द्रका अन्य नेताहरुको पनि प्रत्यक्ष वा अप्रत्यक्ष भुमिका रहन्छ भन्नेपनि ठूलो अर्थ राख्ने देखिएको छ ।

काभ्रे एमालेमा महेश बस्नेतको समेत छुट्टै गुट सक्रिय रहेको स्रोतको दाबी छ । जसले काभ्रेमा बाँस्कोटालाई नेता मानेपछि साँगाभञ्ज्याङ काटेपछि महेश बस्नेतको शरणमा पुग्छन् । यदि महेशले खेल्न चाहे भनेपनि बाँस्कोटा समस्यामा पर्न सक्ने निश्चित छ ।