एमाले काभ्रे जिल्ला अधिवेशनः राष्ट्रिय महाधिवेशनको पुरापुर नक्कल

एमाले काभ्रेका नेताहरु पुस २३ गते हुने १० औँ जिल्ला अधिवेशनमा केन्द्रित भएका छन् ।

विभिन्न छलफल, भेला, सभा, सम्मेलन गरेर उनीहरुले अधिवेशनको महोल बनाइरहेका छन् । यो पटक एमाले काभ्रेले महाधिवेशनको सतप्रतिशत नक्कल गर्न खोजेको देखिन्छ ।

एक महिना अघि चितवनमा सकिएको १० औँ राष्ट्रिय महाधिवेशनको जस्तै तडकभडक एमाले काभ्रेले गरिरहेको छ । धुलिखेलमा एमालेले एकैदिन कम्तीमा ८ वटा बैठक राखेको छ ।

जहाँ पार्टीको भ्रातृ संगठनसँगै क्षेत्रीय होटल संघ, धुलिखेल प्याब्सन, धुलिखेल उद्योग वाणिज्य संघ जस्तो ब्यवसायी संघ संगठनसँग समेत बैठक गरेको छ । ब्यवसायीहरुसँगको छलफलमा एमालेले जिल्ला अधिवेशनका लागि सहयोग मागेको छ ।

एमाले काभ्रेले अधिवेशनका अधिकांश गतिविधि चितवनको अपनाएको छ । प्राज्ञिक ब्यक्तिहरुलाई शुभकामना दिन लगाएको छ । अधिवेशनको प्रचार सामग्री समेत चितवनकै फोटो कपी छ ।

डिजिटल भोटिङ मेसिनको प्रयोग गर्दै छ । अधिवेशन प्रतिनिधिहरुलाई क्यूआर कोडको ब्यवस्था गर्दैछ । विभिन्न उपसमितिहरुले अधिवेशन नजिकिदैँ गर्दा निकै मेहेनत गरिरहेका छन् ।

जिल्ला अधिवेशनका उदघाटनका लागि पार्टी केन्द्रीय अध्यक्ष केपी शर्मा ओली आउने भएकाले पनि यो तामझाम गरेको बताइन्छ । त्यस्तै बागमती प्रदेशका १३ जिल्ला मध्ये पहिलो र देशभरमै संगठीत सदस्य भएको दोस्रो जिल्लाका रुपमा पनि एमाले काभ्रेले तडकभडक गरेको देखिन्छ ।

त्यसमाथि गोकुल बाँस्कोटाले एमाले फुटको कुनै प्रभाव काभ्रे जिल्लामा नपरेको केपी ओली सामु देखाउन पनि यी सारा तामझाम गर्न निर्देशन दिएको बताइएको छ । तर एमालेमा रहँदा फ्रण्ड लाइनमा रहेका अधिकांश नेताहरु नेकपा (एकीकृत समाजवादी) मा छन् ।

ओली आउने भनेपछि राष्ट्रिय तथा अन्तर्राष्ट्रिय मिडियाहरु धुलिखेल केन्द्रित हुनेछ । बाँस्कोटा आफुलाई ७० करोडको काण्ड लाग्दा पनि काभ्रेली जनताको भरपुर साथ छ भनेर मिडिया मार्फत देखाउन चाहान्छन् । ५० हजारको हाराहारी कार्यकर्ता, शुभचिन्तक, शुभेच्छुक धुलिखेलको रंगशालामा उतार्ने एमालेले जनाएको छ । पोलिटब्युरो सदस्यमा समेत रहनुभएका बाँस्कोटा एमाले काभ्रे जिल्ला इन्जार्च पनि हुनुहुन्छ ।

पूर्व सांसद शिव बहादुर देउजा, संविधानसभा सदस्य कृष्णप्रसाद सापकोटा र विदुर सापकोटा, एमालेको ९ औँ जिल्ला अधिवेशनबाट निर्वाचित जिल्ला अध्यक्ष टोक बहादुर वाइबा, मुकुन्द गौतम, बागमती प्रदेश सभाका सांसद लक्ष्मण लम्साल र बसुन्धरा हुमागाई लगायतका अनुभवी नेताहरु नेकपा (एकीकृत समाजवादी) मा छन् ।

काभ्रेको अधिकांश पालिकामा एमालेलाई नेकपा (एकीकृत समाजवादी) ले चुनौती दिइरहेको छ । त्यसका बाबजुद पनि गोकुल बाँस्कोटाले आफ्नो शक्ति प्रर्दशनका रुपमा पुस २३ गते धुलिखेलमा हुने १० औँ जिल्ला अधिवेशनलाई लिइएको छ ।