धुलिखेल नगरपालिकाको कामः पोखरी मासेर पार्क, पार्क मासेर फिटनेस सेन्टर, स्थानीय रुष्ट

पुरानो ताल, पोखरी, धारा, कुवा जस्ता लोप हुँदै गएका संरक्षण गर्ने सबैको दायित्व हो । अझ राज्यले त यस्ता पुरानो संरचनाहरूलाई विशेष चासो दिएर संरक्षण गर्नु पर्ने हुन्छ ।

तर काभ्रे धुलिखेल नगरपालिकामा केही त्यस्ता काम भएका छन् । जहाँ पुराना संरचना मासेर आधुनिकताको नाममा नयाँ संरचना बनाइएको छ । यसको पछिल्लो एउटा उदाहरण हो वडा नम्बर ७ पिपलबोटको फिटनेस सेन्टर ।

नगरपालिकाले पार्क बनाएको ठाउँमा कमल पोखरी थियो । स्थानीयले लामो समयसम्म यहि पोखरी उपभोग गरे । पछिल्लो समय पोखरी पुरियो । स्थानीय तहमा निर्वाचित जनप्रतिनिधि आएपछि पुरिएको पोखरी उत्खनन् हुन्छ भन्ने धेरैले आश गरेका थिए ।

तर नगरले पोखरी उत्खनन् गर्नुको सट्टा कङक्रिट थुपारेर पार्क बनाइदियो । पोखरीको अस्तित्व नै नामेट भयो । पार्कको बीच भागमा स्थानीयको आँखा छल्ने गरी नगरपालिकाले कृत्रिम पोखरी बनायो । कमलको फूल पनि राख्यो ।

तर त्यो धेरै दिन टिक्न सकेन । पार्कमा खेल्न जाँदा पोखरीमा बालबालिका असुरक्षित हुने भन्दै पछि कृत्रिम पोखरी नगरपालिकाले नै पुर्यो । पार्क निर्माण हुँदासम्म पनि स्थानीयले सहेकै थिए । तर पार्क नै विगार्ने गरी नगरपालिकाले फिटनेस सेन्टर बनाउन अनुमति दिएपछि भने स्थानीयहरूले असन्तुष्टि जनाएका छन् ।

पिपलबोटमा फिटनेस सेन्टर नेपाली युथ फिट्नेस एण्ड केलिस्थेनिक्स नामक संस्थाले निर्माण गरेको हो । यो संस्थाले ‘मन्दिर परियोजना’ अन्तर्गत फिटनेस सेन्टर निर्माण गरेको जनाईएको छ । यसलाई केलिस्थेनिक्स पार्क अर्थात् ‘खुल्ला व्यायम स्थल’ नाम दिईएको छ ।

पार्क बिगारेर निर्माण गरिएको ‘खुल्ला व्यायम स्थल’ को उदघाटन नगरप्रमुख अशोक कुमार ब्याञ्जु श्रेष्ठ र वडा नम्बर ७ का वडाध्यक्ष रोमी प्रसाद श्रेष्ठले जिल्ला स्थित सुरक्षा निकायका प्रमुख, सरकारी कार्यालयका प्रमुख, धुलिखेल अस्पतालका प्रतिनिधि तथा प्राज्ञिक ब्यक्तिहरूको उपस्थितमा धुमधामका साथ गर्नुभएको थियो ।

यो संस्थाले देशैभर व्यायमका यस्तै संरचनाहरु बनाउने अभियान सुरू गरेको छ । यो संरचना निर्माणमा जिल्ला प्र हरी कार्यालय काभ्रे र धुलिखेल अस्पतालले आर्थिक सहयोग गरेका छन् ।

कमलपोखरी आसपासका स्थानीयले पार्क र पोखरी नै मासेर फिटनेस सेन्टर निर्माण गरेको प्रति तीब्र असन्तुष्टि जनाएका छन् । उनीहरूले पुर्ख्यौली पोखरी उत्खनन् नगरेर फिटनेस सेन्टर बनाएको प्रति नगरपालिकाको आलोचना गरेका हुन् ।

कार्यक्रममा नगर प्रमुख अशोक कुमार ब्याञ्जु श्रेष्ठले आफ्नो नगरलाई व्यायम मैत्री र स्वस्थ नगरको रुपमा स्थापित गर्न सहयोग गरेको भन्दै फिटनेस सेन्टर निर्माण गर्ने संस्थालाई धन्यवाद दिँदै धुलिखेल नगरका अन्य तिनवटा स्थानहरुमा पनि केलिस्थेनिक्स पार्क निर्माण गर्ने प्रतिबद्धता ब्यक्त गर्नु भएको थियो ।

‘फिटनेस सेन्टर निर्माण गर्नै हुँदैन भनेको कदापी होईन । तर पुरानो संरचना मासेर, कङक्रिट थुपारे मात्रै स्वस्थ सहर कसरी हुन्छ ? नगरपालिकाले त कमल पोखरी उत्खनन् गर्नु पर्थ्यो नि । पुरानो पोखरी पुर्ने । अनि नयाँ संरचना बनाउँदैमा विकास भयो भन्न सुहाउँछ ? नाम उल्लेख नगर्ने सर्तमा अड्डा बजारका एक स्थानीयले मिलिजुली खबरसंग भने ।’