एमाले काभ्रे अधिवेशनः अध्यक्षमा चन्द्र र कञ्चनको दाबी

एमाले काभ्रेको १० औँ  जिल्ला अधिवेशनको मिति नजिकिँदै गर्दा पदाधारीमा आ आफ्नो दाबी गर्ने होडबाजी चलेको छ ।

अध्यक्षमा दुई युवा नेताहरुले समेत दाबी गरेपछि निर्विरोध अध्यक्ष चयन गर्न एमाले काभ्रेलाई मुस्किल पर्ने देखिन्छ । अध्यक्षका लागि बागमती प्रदेश सांसद एवं पूर्वमन्त्री चन्द्र लामा र कञ्चन अधिकारीले दाबी गरेको स्रोतको दाबी छ ।

पदाधिकारीमा आफुलाई सुनिश्चित गर्न अध्यक्षको दाबी गरेको बुझ्ने पनि एमालेमा धेरै छन् । तत्कालिन नेकपा हुँदाकै निरन्तरता स्वरुप एमालेमा बसेका माओवादीको ठूलो तप्कालाई समेत मिलाउनु पर्ने भएकाले यो पटकको जिल्ला अधिवेशनबाट विगत लामो समयदेखि एमालेमा योगदान गरेका धेरै जना पाखा लाग्ने निश्चित छ ।

तर गोकुल बाँस्कोटाले अध्यक्षको दाबी गर्नुभएका चन्द्र लामालाई प्रतिनिधिसभाको निर्वाचनमा काभ्रे निर्वाचन क्षेत्र नम्बर १ को उम्मेदवार बनाउने गरी पनि सहमति गर्न सक्छन् । यो सहमति तत्कालको समस्या समाधानको उपाय मात्रै हुनेछ । किन भने बाँस्कोटाले राप्रपाका नेता रेशम लामालाई सोहि निर्वाचन क्षेत्रबाट उम्मेदवार बनाउने गरी एमाले प्रवेश गराएको चर्चा छ ।

पदाधारीका लागि भित्रभित्रै दाबी गरेपनि अहिलेसम्म औपचारिक रुपमा कसैले उम्मेदवारी भने घोषणा गर्न सकेका छैनन् । जिल्ला अधिवेशन यहि पुस २३ गते धुलिखेलमा सुरु हुनेछ । अधिवेशनमा विद्यूतीय भोटिङ मेसिनको प्रयोग हुनेछ ।