काभ्रे काँग्रेसका नेता हुमागाई देउवाले मनोनीत गरेको केन्द्रीय सदस्य सूचीमा परेनन्

नेपाली काँग्रेस काभ्रेका पूर्व सभापति शिव हुमागाई केन्द्रीय पार्टी सभापति शेर बहादुर देउवाले मनोनीत गरेको केन्द्रीय सदस्यमा नपरेपछि उनी निकटहरु चिन्तित बनेका छन् ।

सहमहामन्त्रीको टिकट दिने आवश्यक सहित जिल्ला सभापतिका लागि देउवाका निकट मानिएका तीर्थ लामालाई सहयोग गरेका हुमागाई अन्तत मनोनित सदस्यमा समेत नपरेका हुन् । हुमागाई समर्थकहरुले मनोनीत केन्द्रीय सदस्य पक्का हुने दाबी गरेका थिए ।

तर आज सभापति देउवाले १० जनालाई केन्द्रीय सदस्यमा मनोनीत गर्दा हुमागाईको नाम परेन् । गणेश लामा खुल्ला सदस्यबाट र निवर्तमान जिल्ला सभापति मधु आचार्य खास आर्य कोटाबाट केन्द्रीय सदस्यमा निर्वाचित भइसक्नु भएको छ ।

मनोनीत केन्द्रीय सदस्यको सूचीमा हुमागाईको नाम नपरेपछि जिल्लामा थप चेपुवामा पर्ने हुमागाईको पक्षको चिन्ता छ । हुमागाई कृष्ण प्रसाद सिटौलाको गुट चलाउनु हुन्छ ।

सभापति शेरबहादुर देउवाले कांग्रेस महाधिवेशनमा पराजित सभापति, उपसभापति, महामन्त्री लगायतलाई केन्द्रीय सदस्यमा मनोनीत गर्नुभएको हो । देउवाले रामचन्द्र पौडेल, सभापतिमा पराजित प्रकाशमान सिंहलाई केन्द्रीय सदस्यमा मनोनीत गर्नुभएको छ ।

यसैगरी विमलेन्द्र निधि, विजयकुमार गच्छदार, कृष्णप्रसाद सिटौला, प्रकाशशरण महत, नारायण खड्का, उमा रेग्मी, सुजाता कोइराला र मीनबहादुर विश्वकर्मालाई केन्द्रीय सदस्यमा मनोनीत गरिएको छ ।

कांग्रेसको विधान, २०१७ (संशोधन सहित) को धारा २१ को उपधारा (१०) बमोजिम उनीहरूलाई मनोनीत गरिएको मुख्य सचिव कृष्णप्रसाद पौडेलद्वारा विज्ञप्तिमा उल्लेख छ ।

यद्यपी यो पटकको मनोनीतमा नपरेपनि अर्को पटक मनोनीत गर्दा हुमागाई केन्द्रीय सदस्य बन्ने उनी निकटस्थहरु बताउँछन् । काँग्रेसको अझै केही जिल्लामा जिल्ला अधिवेशन हुनै बाँकी छ । ती जिल्लामा अधिवेशन सकिएपछि देउवाले फेरी एक पटक केन्द्रीय सदस्य मनोनीत गर्ने गरी अहिले १० जनालाई मात्रै मनोनीत गरिएको बताइएको छ ।