नयाँ वर्ष मनाउने पर्यकटले भरिए धुलिखेलका होटल

काभ्रेको पर्यटकीय नगर धुलिखेलका सबै होटल भरिएका छन् । अंग्रेजी नयाँ वर्ष सन् २०२२ को प्रारम्भमा धुलिखेलमा आन्तरिक तथा बाह्य पर्यटकहरुको चहलपहल निकै देखिएको हो ।

सन् २०२१ को अन्तिम दिन राती अबेरसम्म पनि धुलिखेलका प्रायः जसो होटल गुञ्जयमान भइरहेका थिए । नयाँ वर्षलाई लक्षित गरेर काभ्रेका होटल ब्यवसायीहरुले नयाँ र आकर्षक प्याकेजहरु ल्याएका छन् ।

धुलिखेलमा यो नयाँ वर्षमा बाह्य भन्दा पनि आन्तरिक पर्यटकको संख्या धेरै देखिन्छ । विभिन्न सरकारी तथा गैर सरकारी संघसंस्थाको समिक्षा बैठक, अन्तक्रिया, गोष्ठी जस्ता कार्यक्रमले पनि वर्षको अन्तिम साता होटल ब्यवसायीहरुलाई निकै राहत पुगेको छ ।

लगातार कोरोना भाइसरको मारमा परेका होटल ब्यवसायी केहि हदसम्म भएपनि तंग्रिएको अनुभुति गर्न थालेका छन् । धुलिखेलका साना, मझौला र ठूला होटलहरु पुरै भरिएका छन् ।

त्यस्तै बल्थली, नगरकोट, नमोबुद्ध, दोलालघाट, बनेपा, पनौती जस्ता सहरमा रहेका होटलहरुले पनि सन् २०२१ को अन्तिम दिन राम्रो आर्थिक कारोबार गरेका छन् ।

आज शनिबार प्रायः सरकारी कार्यालय समेत बन्द हुने भएकाले घुम्न आउने पर्यटकको संख्या पनि ह्वात्तै बढ्ने अनुमान गरिएको छ । धुलिखेलमा अधिकांश होटल एकसाता अघि देखिनै बुक भैसकेको होटल ब्यवसायीहरुले बताएका छन् ।

कम कोलाहल, राजधानी काठमाण्डौबाट नजिकको पहाडी सभ्यता भएको धुलिखेल धेरैको रोजाईमा पर्ने गरेको छ । तर यहाँका होटलहरुले स्थानीय संस्कार र संस्कृतिको प्रवर्द्धनमा भने खासै काम गर्न सकेका छैनन् ।