काभ्रे एमालेले यहि पुस २३ गते धुलिखेलमा शक्ति प्रदर्शन गर्ने भएको छ ।
१० औं जिल्ला अधिवेशनको उदघाटनका दिन एमालेले शक्ति प्रदर्शन गर्न लागेको हो । अधिवेशनको उदघाटन केन्द्रीय पार्टी अध्यक्ष एवं पूर्वप्रधानमन्त्री केपी ओलीले गर्ने गरी तयारी थालिएको छ ।
त्यो दिन धुलिखेल नगरपालिकाको वडा ७ स्थित रंगशालामा हजारौं कार्यकर्ता उतार्ने एमाले काभ्रेले जनाएको छ । जिल्लाको १३ वटा पालिका र काभ्रे-काठमाडौँ सम्पर्क मञ्चका सहित गरेर ३४ हजार ३ सय नेता कार्यकर्ता रंगशालामा भेला हुनेछन् ।
अधिवेशनमा सबैभन्दा बढी धुलिखेल, बनेपा र पनौती नगर कमिटीले ५/५ हजार जनसहभागिता गराउनु पर्ने जिल्ला कमिटीले निर्णय गरेको छ । त्यस्तै मण्डनदेउपुर नगर कमिटीले ४ हजार, पाँचखाल नगर कमिटीले ३ हजार र नमोबुद्ध नगर कमिटीले २ हजार ५ सय सहभागी गराउने जिल्ला पार्टी अध्यक्ष अशोक कुमार ब्याञ्जु श्रेष्ठले जानकारी दिनुभयो ।
यो तथ्याङ्क हेर्दा जिल्लाको ६ वटा नगरपालिकाबाट मात्रै २४ हजार ५ सय एमाले नेता कार्यकर्ता रंगशालामा सहभागी हुनेछन् ।
जिल्लाको ७ वटा गाउँपालिका मध्ये तेमाल गाउँपालिका कमिटीले २ हजार कार्यकर्ता उतार्ने निर्णय जिल्ला कमिटीले गरेको छ । भुम्लु, चौरीदेराली, रोशी र बेथानचोक गाउँपालिका कमिटीले १/१ हजार कार्यकर्ता सहभागी गराउनु पर्ने छ । महाभारतले ३ सय र खानीखोला गाउँपालिका कमिटीलाई ५ सय कार्यकर्ता सहभागी गराउने जिम्मा तोकिएको छ ।
७ वटा गाउँपालिकाबाट मात्रै एमालेले ६ हजार ८ सय कार्यकर्ता रंगशालामा उतार्ने छ । त्यस्तैगरी काभ्रे-काठमाडौं सम्पर्क मञ्चबाट ३ हजार कार्यकर्ता सहभागी हुने अध्यक्ष ब्याञ्जुले बताउनुभयो ।
जिल्ला कमिटीले अधिवेशनमा सहभागीहुने सबैका लागि यातायातको ब्यवस्थापन स्थानीय कमिटीले नै गर्नु पर्ने निर्णय गरेको छ ।
एमालेको १० औं जिल्ला अधिवेशनको उदघाटन सत्र रंगशालामा र बन्द सत्र धुलिखेल नगरपालिकाको हलमा हुनेछ ।
Facebook Comments