काभ्रेको धुलिखेल नगरपालिकालाई ‘स्वस्थ शहर’ बनाउन ७ बुँदे प्रतिबद्धता जारी गरिएको छ ।
संघीय सरकारको स्वास्थ्य सेवा विभागका प्रतिनिधि, प्रदेश सरकारका प्रतिनिधि, स्थानीय सरकारका जनप्रतिनिधि र नगरपालिकाका विभिन्न शाखाहरुको सहभागितामा ७ बुँदे स्वास्थ्य प्रतिबद्धता पारित गरिएको छ ।
सिन्धुपाल्चोकको सुकुटेमा दुईदिनसम्म नगरपालिकाको स्वास्थ्य सूचकका बिषयमा ब्यापक छलफल गरेपछि ७ बुँदे स्वास्थ्य प्रतिबद्धता पारित गरिएको धुलिखेल नगरपालिकाका स्वास्थ्य शाखा प्र्रमुख सन्दीप केसीले जानकारी दिनुभयो ।
पारित प्रतिबद्धताको पहिलो बुँदामा स्वस्थ शहर कार्यक्रममा राजनैतिक प्रतिबद्धताको लागि सबै राजनैतिक दलहरुसँगको सहकार्य तथा जनप्रतिनिधिहरुको प्रतिबद्धता सहित अपनत्व बढाउने भनिएको छ ।
स्वस्थ शहर अभियानलाई अन्तर्राष्ट्रिय तथा राष्ट्रिय स्वास्थ्य सेवाको मुल प्रवाहमा समावेश गर्न पहल गर्ने । स्वस्थ वातावरण, नसर्ने रोग, पोषण तथा स्वास्थ्य प्रवर्धनका कार्यक्रममा जोड गर्ने ।
धुलिखेल नगरका शिक्षकहरुलाई विशेष स्वास्थ्य तालिम सहित स्वास्थ्य क्षेत्रमा प्रवर्धनात्मक तथा जनचेतनामुलक कार्यक्रममा सहकार्य गरिने । समुदायका स्वास्थ्य सूचनाहरु एकीकृत गरी स्वास्थ्य सूचना केन्द्र सक्रिय बनाउने ।
स्वास्थ्य अनुसन्धानका लागि काठमाण्डौ विश्वविद्यालय, धुलिखेल अस्पताल तथा सरोकारवालासँगको समन्वयलाई जोड गर्ने । स्वास्थ्य शहर कार्यक्रममा स्वास्थ्यकर्मीको क्षमता अभिबृत्तिका लागि विशेष तालिम तथा उत्प्रेरणाका कार्यक्रम ल्याइने उल्लेख गरिएको छ ।
घोषणा पत्रले सबै पक्षलाई स्वस्थ शहर निर्माणमा घचघच्याउने स्वास्थ्य शाखा प्रमुख केसीले बताउनुभयो । ‘हामीले पारित गरेको प्रतिबद्धता त्यस्तो शक्ति हो जसले अन्योल, दुबिधा र अनिश्चितता हटाएर लक्ष्य प्राप्तिका लागि मार्ग निर्देश गर्छ । शाखा प्रमुख केसीले भन्नुभयो ।’
Facebook Comments