सिन्धुपाल्चोक र काभ्रे बीच दोलालघाट क्षेत्रको विवाद पुनः सतहमा आएको छ । यो पटक भने समाधान गरेरै छोड्ने अठोट सिन्धुपाल्चोककाले लिएका छन् ।
पञ्चकालिन सिमाना विवाद गणतन्त्र आउँदासम्म पनि समाधान हुन सकेको छैन् । सबै कुरा हेर्दा दुई नेता बीचको स्वार्थ पूर्ण विवाद देखिन्छ । यसको चरममा मारमा लामो समय देखि १२० घरधुरी परिरहेको छ ।
काभ्रेको भुम्लु गाउँपालिका र सिन्धुपाल्चोकको चौतारा साँगाचोकगढी नगरपालिकाले आ आफ्नो क्षेत्र दाबी गर्छन् बेलडाँडा, दोलालघाट, बन्देउटार र डुम्रेबेँसी । तर निकै लामो समयदेखि पिडाबाट उन्मुक्ति स्थानीय पाउन सकेका छैनन् ।
दुबै स्थानीय तहले नागरिकको भावना अनुसार काम गर्न सकेको छैनन् । यो क्षेत्र स्थानीय प्रशासन ऐन २०२८ को दफा ३ ले दिएको अधिकार प्रयोग गरेर तत्कालिन तुलसी गिरी प्रधानमन्त्री हुँदा ०३३ साल माघ २८ गते मन्त्रिपरिषद्को निर्णय राजपत्रमा प्रकाशित थियो ।
त्यो बेला मन्त्रिपरिषद्ले सुनकोसी र इन्द्रावती नदीलाई सिमाना मानेर वारिपारि सिन्धुपाल्चोक र काभ्रे हुने स्पष्ट निर्णय गरेको थियो । २०३८ सालमा तत्कालीन राष्ट्रिय पञ्चायत सदस्य काभ्रेली नेता गोविन्द उप्रेतीले मन्त्रिपरिषद्को निर्णयविपरीत ती गाउँलाई काभ्रेको भूभाग भनी दाबी गर्नुभयो ।
तर, सरकारको निर्णयपछि स्थलगत अध्ययन र नापी गरेर २०४३ सालमा नापी महाशाखाले सुनकोसी र इन्द्रावती नदीवारिका बेलडाँडा, दोलालघाट, बन्देउटार र डुम्रेबेँसीलाई सिन्धुपाल्चोकको क्षेत्राधिकारभित्र राखेको थियो । जुन प्रमाण अहिलेपनि सुरक्षित छ ।
उप्रेतीले सिन्धुपाल्चोकको जमिन जर्बजस्त काभ्रेको दाबी गरेपछि त्यो बेलादेखि नै विवादित बनेको हो । त्यतिखेर सिन्धुपाल्चोक साँगाचोकका तत्कालिन प्रधानपञ्च जनक गिरीले उप्रेतीसँग पटक–पटक संघर्ष गरेको जानकारहरु बताउँछन् । आफ्नो क्षेत्राधिकारमा पर्ने भूमिबारे आवाज उठाउँदा उप्रेतीसँग गिरीको कयौँ पटक झगडा नै भएको साक्षीहरुको भनाई छ ।
तर, त्यो बेला उप्रेती शक्तिमा हुनुहुन्थ्यो । प्रधानपञ्चको कुराको सुनुवाई भएन् । २०४३ सालमा नापीले यी गाउँ सिन्धुपाल्चोकभित्र पर्छन् भनेर स्पष्ट नक्सा दिँदा पनि राष्ट्रिय पञ्चायतमा रहेका उप्रेतीले २०४५ सालदेखि कित्ता नापी गर्ने सरकारी अभियानलाई रोक्का गरिदिएको स्थानीयहरु बताउँछन् । त्यसयता बेलडाँडा, दोलालघाट, बन्देउटार र डुम्रेबेँसीे क्षेत्रमा थप कित्ता नापी भएको छैन् ।
सिन्धुपाल्चोकको नागरिकता हातमा बोकेर काभ्रेको नागरिक हुँ भन्न बाध्य पारिएको छ । यो समस्या समाधान गर्न स्थानीयहरुले दुबै जिल्लाका स्थानीय सरकारसँग धेरै पटक हारगुहार गरिसकेका छन् । तर अहिलेसम्म ठोस परिणाम आउन सकेको छैन् ।
Facebook Comments