धुलिखेल, २५ कात्तिकः धुलिखेल नगरपालिकामा समुदायस्तरमै ब्यापक कोरोना भाइरस फैलिएको छ । स्वास्थ्य कार्यालयले दैनिक अद्यावधिक गर्ने कोरोना संक्रमितको तथ्यांक हेर्दा पनि धुलिखेल नगरपालिकाका पछिल्लो केहिदिन यता पहिलो नम्बरमा पर्ने गरेको छ ।
धुलिखेल अस्पताल देखि गाउँ गाउँमा रहेका स्वास्थ्य चौकीमा कार्यरत स्वास्थ्यकर्मी समेत कोरोना भाइरसबाट संक्रमित भएको छ । कतिपय निको भएका छन् भने कति अझै उपचार गराइरहेका छन् । हालसम्म स्वास्थ्य चौकीमा कार्यरत ८ जना स्वास्थ्य कर्मी संक्रमित भएको नगरपालिकाका स्वास्थ्य शाखा प्रमुख सन्दिपले जानकारी दिनुभयो ।
वडा नं २ रवि ओपी स्वास्थ्य चौकीका १ महिला, १ पुरुष, वडा नं ५ श्रीखण्डपुर का १ महिला, वडा नं ८ धुलिखेल प्राथमिक स्वास्थ्य केन्द्रका २ महिला ,१ पुरुष, वडा नं ९ स्वास्थ्य चौकीका १ महिला र वडा नं १० शारदा बतासे स्वास्थ्य चौकीका १ पुरुष गरि ८ जना स्वास्थ्यर्की संक्रमित भएका हुन् । सहरभन्दा टाढा, सेवाग्रहीकाे खास भिड नलाग्ने गाउँगाउँमा रहेका स्वास्थ्य चौकीहरु तुलनात्मक रूपमा खास जोखिम मानिएकाे थिएन् । तर धमाधम एकपछि अर्को स्वास्थ्य कर्मी संक्रमित भएपछि थप जोखिम गाउँ तहसम्मै पुगेको छ ।
स्वास्थ्य शाखा प्रमुख केसीका अनुसार कतिपय संक्रमित स्वास्थ्यकर्मीका परिवारमा गम्भीर किसिमको लक्षण देखिएको छ । केसीले अवस्था निकै जटिल अवस्थामा पुगेको भन्दै आफ्नो स्वास्थ्य प्रति सदैब ख्याल गर्न आग्रह गर्नुभयो । शाखा प्रमुख केसीले सामाजिक सञ्जाल फेसबकमा स्वास्थ्य चौकीमा कार्यरत स्वास्थ्य कर्मीसंक्रमित भएको विवरण सार्वजनिक गर्दै ‘जनताको स्वास्थ संकटको यो घडीमा स्वास्थ्यकर्मीहरु उच्चमनोवल कायम राख्दै अझ सजग, सचेत र होसियारीका साथ आफ्नो कार्यक्षेत्रमा खटिरहनु समयको माग भएको भन्दै नगरपालिका उचित मुल्यांकन गर्नुपर्नेमा जोड दिनुभएको छ ।
धुलिखेलमा हालसम्म ५४४ जना संक्रमित भएका छन् । जसमा २८० जना पुरुष र २६४ जना रहेका छन् । ७ जना पुरुष र २ जना महिला गरी ९ जनाको कोरोना भाइरसकै कारण निधन भएको छ । अस्पतालको आइसोलेसनमा १२ जना रहेका छन् भने होम आइसोलेसनमा १५० जना रहेको स्वास्थ्य शाखा प्रमुख केसीले बताउनुभयो । धुलिखेल १२ वटा वडा मध्ये सबैभन्दा बढी वडा नम्बर ७ मा १०८ जना संक्रमित भएका छन् भने सबैभन्दा कम वडा नम्बर १ मा ५ जना संक्रमित भएका छन् ।
